मराठी भाषा संवर्धन पंधरवडा - प्रस्तावना

▪मराठी भाषा संवर्धन पंधरवडा▪
➖➖➖➖➖➖➖➖➖➖

माय माऊल मराठी स्त्रिच्या, अंकावरचे बाळ आम्ही
खबरदार जर तिला हिणविता, होऊ कर्दळकाळ आम्ही
अलंकारते शब्दसुरांचे,गुंफून तिजला बहाल करु
महाराष्ट्र जय जय जयश्री मराठी, एकच हा जयघोष करु

[२०१४ साली, शाहीर राजू राऊत यांच्या पोवाड्याचा कर्नाटक राज्याच्या आठवीच्या अभ्यासक्रमातील क्रमिक पाठ्यपुस्तकात समावेश केला आहे. - https://goo.gl/hh7mkr]

महाराष्ट्र शासनाने १ ते १५ जानेवारी मराठी भाषा संवर्धन पंधरवडा म्हणून घोषित केलेला आहे. मराठी भाषा पंधरवडा म्हटल्यावर अनेकांच्या भुवया उंचावतात, महाराष्ट्रात असून मराठी पंधरवडा कशासाठी? काय फायदा होईल याचा? २७ फेब्रुवारीला तर मराठी दिन असतो, मग आत्ता मराठी पंधरवडा कशासाठी?

जसं एखाद्या पर्यटनस्थळाच्या जाहिरातीसाठी त्या ठिकाणी उत्सव साजरा केला जातो, त्या पर्यटनस्थळाचा इतिहास, भूगोल, आजूबाजूचा परिसर, तिथे गुंतवणूक केल्यास मिळणारे फायदे, अशा विविध गोष्टींवर प्रकाश टाकला जातो, त्याचप्रमाणे मराठी भाषा आणि तिचं महत्त्व, तिचा इतिहास, तिच्या विविध बोली, तिचं साहित्य, हजारो मराठी पुस्तके-ग्रंथांमध्ये उपलब्ध असलेली माहिती, मराठी माध्यमाच्या शाळेत शिकलात तर मिळणारे फायदे, तिच्या समोरची आव्हाने, काळानुरूप नवं स्वीकारण्याची तिची ताकद, या आणि अशा अनेक गोष्टींवर लोकांनी एकत्र यावं, चर्चा करावी, तिचं महत्त्व जाणून घ्यावं, तिचा प्रचार-प्रसार करावा, आणि अशा दैदीप्यमान इतिहास लाभलेल्या भाषेचं संवर्धन करण्यासाठी पुढाकार घ्यावा हा शासनाचा मराठी भाषा पंधरवड्यामागे हेतू आहे.

जसं वर्षाच्या सुरुवातीला आपण संकल्प करतो आणि वर्षभर त्याप्रमाणे आचरण करण्याचा प्रयत्न करतो अगदी त्याचप्रमाणे आज १ जानेवारीला काही भाषिक संकल्प करा.

उदा.

- मी सार्वजनिक आणि वैयक्तिक जीवनात अधिकाधिक मराठी वापरेन आणि इतरांनादेखील मराठी वापरण्याचा आग्रह करेन

- मी माझ्या मुलांना मराठी माध्यमाच्या शाळेतच शिकवेन

- मी मराठी संगीत-चित्रपट-नाटकांचा आवर्जून आस्वाद घेईन

- मी नेहमी मराठी पुस्तके वाचेन

- मी सोशल मिडीयावरील विविध अनुप्रयोग(apps) मराठीतून वापरेन आणि मराठीत नसतील तर निर्मात्यांकडे त्यासाठी आग्रह करेन

- मी मला खाजगी क्षेत्रातून मिळणाऱ्या विविध सेवा मराठीतूनच मिळाव्या यासाठी आग्रह धरेन, उदा. एटीएम मध्ये मराठी भाषेचा पर्याय, ग्राहक सेवा प्रतिनिधीकडे मराठीतूनच बोलण्याची मागणी, इ.

- मी त्रिभाषा सूत्राची काटेकोरपणे अंमलबजावणी होते आहे का यावर लक्ष ठेवेन, त्रिभाषा सूत्राचा वापर झाला नसेल तर वेळोवेळी सरकारी यंत्रणांना त्यांची चूक लक्षात आणून देईन

- 'हिंदी आपल्या देशाची राष्ट्रभाषा नाही', आणि राष्ट्रभाषेचा राष्ट्राच्या एकात्मतेशी काडीचादेखील संबंध नाही, हे माझ्या मित्रपरिवाराला पटवून देईन.

इ.

तर पुढील १५ दिवस, ||ज्ञानभाषा मराठी|| च्या विविध भाषिक उपक्रमांमध्ये सक्रीय सहभाग तर नोंदवाच परंतु पुढील वर्षभर भाषा संवर्धनासाठी वैयक्तिक पातळीवर सर्वतोपरी प्रयत्न करा.

#मराठीभाषासंवर्धनपंधरवडा
#राजभाषामराठी
#ज्ञानभाषामराठी
#व्यवहारभाषामराठी
#मराठीबोलाचळवळ
#महाराष्ट्र